ONDERTV.ORG
1992-ci il fevralın 25-dən 26-na keçən gecə Azərbaycan tarixinin ən ağır və faciəli hadisələrindən biri baş verdi. Xocalı şəhərində dinc əhaliyə qarşı həyata keçirilən kütləvi qırğın nəticəsində yüzlərlə insan amansızcasına qətlə yetirildi. Bu hadisə Azərbaycan xalqının yaddaşına silinməz iz saldı. Rəsmi məlumatlara əsasən, Xocalı faciəsi zamanı 613 nəfər öldürüldü. Onların arasında 63 uşaq, 106 qadın və 70 qoca var idi. 8 ailə tamamilə məhv edildi, 25 uşaq hər iki valideynini, 130 uşaq isə valideynlərindən birini itirdi. Yüzlərlə insan yaralandı, 1275 nəfər girov götürüldü, onlardan bir qisminin taleyi hələ də naməlum olaraq qalır. Faciə zamanı şəhər tamamilə dağıdıldı, dinc sakinlər qarlı-şaxtalı havada meşələrə və dağlara üz tutaraq canlarını qurtarmağa çalışdılar. Lakin onların bir çoxu yolda amansızcasına qətlə yetirildi. Bu hadisə beynəlxalq humanitar hüququn və insanlıq prinsiplərinin kobud şəkildə pozulması kimi qiymətləndirilir.
Xocalı faciəsi təkcə Azərbaycan xalqına qarşı deyil, bütövlükdə bəşəriyyətə qarşı törədilmiş ağır cinayət kimi dəyərləndirilir. Azərbaycan dövləti bu faciənin dünya ictimaiyyətinə çatdırılması və beynəlxalq səviyyədə hüquqi-siyasi qiymət alması istiqamətində ardıcıl iş aparır. Bir sıra ölkələrin parlamentləri və beynəlxalq təşkilatlar Xocalı hadisələrini soyqırımı və ya kütləvi qırğın kimi tanıyıblar.
Bu gün Xocalı qurbanlarının xatirəsi dərin ehtiramla yad edilir. Hər il fevralın 26-da ölkə ərazisində anım mərasimləri keçirilir, şəhidlərin ruhuna dualar oxunur. Xocalı faciəsi xalqımızın yaddaşında daim yaşayacaq və bu cür faciələrin bir daha təkrarlanmaması üçün tarixi dərs kimi xatırlanacaq.