17.02.2026-cı il tarixində Sənaye və Texnologiya Kollecində İT klubunun ümumi iclası keçdi. İlasda tərbiyə işləri üzrə direktor müavini Asəf Məmmədov, mühəndis - proqramlaşdırıcı İqbal Cəfərov və klub üzvləri iştirak etdilər. Akt zalında keçirilən bu görüşdə klubun yeni strukturu, fəaliyyət istiqamətləri və qarşıdakı planları təqdim edildi. Tədbir çərçivəsində İT klubunun sədri və Azedev-in qurucusu Yusif Əzizov komandanın vizyonu, inkişaf strategiyası və gələcək hədəfləri barədə çıxış etdi. Bildirdi ki, klub fəaliyyətini dörd əsas istiqamət üzrə davam etdirəcək: Cyber Security, Game Development, Data Science & Artificial Intelligence və Web Development. Görüş zamanı mentorlar da çıxış edərək tələbələrə texniki inkişaf, komanda işi, intizam və real layihə təcrübəsinin əhəmiyyəti barədə məlumat verdilər. Xüsusilə davamlılığın, praktik yanaşmanın və məsuliyyətli fəaliyyətin önəmi vurğulandı. İclasda həmçinin filtr mərhələsi, mentor bölgüsü və qarşıdakı dövrdə start veriləcək layihələr barədə məlumat təqdim olundu. Aktiv və məsuliyyətli üzvlərin gələcəkdə Azedev-in böyük və yeni layihələrində iştirak imkanı əldə edə biləcəyi qeyd edildi.
